Euskara Batuaren Eskuliburua

Ez da ohikoa izaten izen bereziak modu horretara juntatzea, baina zuzenak dira eta baliokideak honako hiru hauek eta antzeko moduak: Bizkaiko eta Arabako bertsolariak (horixe da molde normal eta erabiliena) / Bizkai eta Arabako bertsolariak / Bizkai-Arabetako bertsolariak (*Bizkaia eta Arabako; *Bizkaia-Arabetako).

Adibide gehiago: Bizkai-Gipuzkoetako burdingintza galduan gelditu zen 1650 ondoan. Gipuzkoa-Nafarroetako aditza. Bilbo-Donostietako burgesak ez ziren jauntxoak. Espainia-Frantzietako eskualdeen izenak. Azpeiti-Azkoitietako bertsolariak (*Azpeitia-Azkoitietako). Garbi ikusten denez, -a artikulua duten izenek (Bizkaia, Azpeitia) artikulua galdu egin behar dute molde laburtuetan: Bizkai eta Arabako bertsolariak (*Bizkaia eta Arabako) / Bizkai-Arabetako bertsolariak (*Bizkaia-Arabetako). (→ izen berezi artikuludunak eta a itsatsidunak)

Euskaltzaindiak arautu gabeko kontua izanik ere, zilegi dira izen arruntez osatuak ere: 1909ko apiril-maiatzetan, 1910eko urri-azaroetako eguraldia (*apirila-maiatzetan, *urria-azaroetako), bizkaitar-gipuzkoarrentzat, gaur-biharretan...