Euskal alfabetoaren hogeita seigarren letra da. Letra hau eta euskal alfabetoko beste zenbait letra —c, q, v eta w- ohiko euskal hitzak idazteko ez diren arren, kanpoko izenak eta hitzak transkribatzeko sartu dira euskal alfabetoan. Adibidez: Yemen, York, Yosemite, Yucatán, Tanganyka, Kenya..., yanki, yarda, yate, yen, yeti, yoga, brandy, gay, ferry, playboy, sexy... Hala ere, badira egokituriko hitzak eta izenak ere: maiestatiko, maiuskula, proiekzio... (*mayestatiko, *mayuskula, *proyekzio/*projekzio), Himalaia, Paraguai, Troia... (Himalaya, Paraguay, Troya). [EH; 17. araua] (→ proiektu (projektu) )

DEKLINABIDEA HITZ-BUKAERAN. «y letraz amaitutako hitzak i letraz amaitutako hitzak bezala deklinatzen dira» [148. araua]; alegia, euskarazko espaloi (izen arrunta) eta Garai (izen berezia) bezala. Diptongoa direnetan sortzen da gehienbat zalantza. Adibideak: Monte-Carloko rallya. Ferryaren matxura. Sidneyko biztanleak. Annecyn bizi zen, baina Jerseyra (*Jerseyera) joan zen bizitzera. Federico Garcia Godoyk (*Godoyek) hiru eleberri idatzi zituen. Bi brandyk kaltea eragin. Argituko ote da inoiz Kennedyren hilketa? (→ erdal hitzen deklinabidea)

Gay hitza dela eta, instrumental mugagabean, gayez behar du (zenbait lesbianaz eta gayez hitz egin), gaiez, deiez, jaiez... (edozein gaiez, deiez, jaiez...) hitz silababakarrekin egiten den bezala. [29. araua] (→ diptongoz (-ai, -ei, -oi, -au, -eu) bukatzen diren izenen deklinabidea)