Plazaberri

Erdi Aroko pertsona-izenak araua, 181.a, argitaratu du Euskaltzaindiak

  • Irizpideak zehazteaz gainera, guztira 211 pertsona-izen ageri dira 181. arauan, bi sailetan banatuak:
    1- Europako lurralde kristauetako pertsona-izen nagusiak, hala nola Gilen Ockhamgoa, Boccaccio, Joan Beldurgabea, Marco Polo edo Urraka.
    2- Kristandadearen eremuaz kanpoko pertsona-izenak (musulmanak, juduak eta turko-mongolak), hala nola Al-Khwarizmi, Almanzor/Al-Mansur, Avizena/Ibn Sina, Mahoma/Mahomet/Muhammad, Yehuda Halevi edo Gengis Khan.
  • Pertsona-izen historikoez gainera, 'Mila gau eta bat gehiago' obrako zenbait pertsonaiaren izenak ere sartu dira zerrendan, hala nola Aladin eta Xeherezade, bai eta literatura arturikoan ageri pertsonaia nagusiak ere, hala nola Lantzelot Aintzirakoa, Ginebra, Pertzeval/Presebal edo Mahai Biribileko zaldunak.
  • Bestalde, pertsona-izena ez bada ere, Ala/Allah jainko-izena ere sartu da zerrendan, erabilera-maiztasun handiko izena baita.

    Xabier Kintana eta Alfontso Mujika

    erdiaroa

 

Berritzaile izateko nahia darie 2016ko Azkue sarietako irabazleei

  • 2015eko edizioarekin alderatuta, bikoiztu egin da 2016ko Resurreccion Maria Azkue Literatur Sarietako partaidetza. Gainera, epaileek lanen kalitatea eta tonu berritzailea nabarmendu dute.
  • A mailan (10 eta 13 urte bitarteko gazteen saila) Lohizune Telletxea, narrazioan, eta Izar Arronategi, poesian, gailendu dira; B mailan (14 eta 17 urte bitartekoak) Peru Amorrortu eta Lide Mikele izan dira irabazleak.
  • Oiartzun, Ziburu, Irun, Gernika-Lumo, Azpeitia, Ondarroa, Gasteiz, Beasain, Altsasu eta Mungiakoak dira aurten nabarmendu diren idazle gazteak.
  • 1991tik, Akademiak berak eta BBK Fundazioak antolatzen dituzten sari hauen xedea da idazle gazteak literatura mundura erakartzea.
  • Andres Urrutia euskatzainburuak irabazle eta parte-hartzaile guztiak zoriondu ditu, eta esan die lehiaketa hau "lehen pausoa" baino ez dela beraientzat. "Eta ez dadila izan azkena -gehitu du Urrutiak-, behar beharrezkoak zaretelako euskara bera hedatzeko". Honela, literaturaren bidea jarrai dezaten animatu ditu, bide batez, beraien "sentimenduak, pentsaera eta bizipenak jendeari transmititzeko, euskaraz".

    image1
    (2016ko Azkue Literatur Sarietako irabazleak, epaile eta irakasleekin)

 

Larunbat honetan, 2016ko Manuel Lekuona Saria jasoko du Jean-Louis Davant euskaltzainak, bere jaioterrian

  • Goizeko 10:30ean egingo da sari-emate ekitaldia, Ürrüstoi-Larrabilen (Zuberoa).
  • Urteetan eta urteetan euskara eta euskal kulturaren alde egindako lan eskerga saritu du Eusko Ikaskuntzak, hain zuzen, “euskara eta euskal kultura indarberritzeko egin duen etengabeko esfortzu eta lanagatik”.
  • Saria emateko izendatutako epaimahaiak azpimarratu duenez, Davanten ekarpenak “bat egiten du Manuel Lekuonak euskara eta euskal kultura indarberritzeko izan zituen kezkekin”, belaunaldi oso batentzako ezinbesteko erreferente bihurtu dela.
  • Jean-Louis Davant filologo, idazle eta euskaltzaina Ürrüstoi-Larrabilen (Zuberoa) jaio zen, 1935ean. Laborantza ikasketak burutu zituen Angers hiriko Mendebaldeko Unibertsitate Katolikoan eta 1957an eskuratu zuen Agronomia Ingeniari titulua. 1961ean, Hazparneko Laborantza Eskolaren sortzaileetakoa izan zen, bertan hasi zela lanean. Agronomia eskolak eman zituen, 1995ean erretiroa hartu zuen arte.

    0 3


 

Piarres Charritton (profil bat)

"Piarres Charrittonen ezagutza egin nuen Maule-Lextarreko Saint-François (d’Assise) ikastetxe katolikoan, 1951-1952 eta 1952-1953 ikasturteetan; gaztelania irakatsi zigun garai hartan. Batxilergorako azken urteetan ginen mutiko gazteak bulkatu gintuen Eskualzaleen Biltzarrak urtero eskoletan antolatzen zituen lehiaketetan parte hartzera, eta hor hasi nintzen ni ere euskaraz idazten. Bigarren maila bukatzean, Angerseko laborantza ingeniari eskolan sartzen lagundu  ninduen.

Gero, 1957an eta 1958an, Eskualdun Gazteriako kapilau edo omonier lanetan ari zelarik hobeki ezagutu nuen, eta harenganik asko ikasi euskaldungoaz eta euskal mugimenduaren historiaz. Gazte hilabetekariko buru zela, kazeta horretan hilabetero idatzi nuen 1957ko buruiletik 1958ko abendura, lehen urrats publikoak eginez lan horretan. Gainera, karia horretara, Eskualdun Gazteriako, eta, bereziki, Gazte kazetako idazkaria zen Joana Idiarten ezagutza egin nuen, eta 1961az geroztik espos gara, guraso, aitaita-amama ere bai.

2009 PX Urkiolan JUANTXO EGAÑA argazkilari
(Piarres Charritton)

 

Plazaberrin harpidetu:

Sare sozialetan:

Twitter

 

Gure agendan harpidetu:

Azken argitalpenak

Argitalpen guztiak ikusi