'Mende Berria Kantuz' ikuskizuna, Arriaga Antzokian

: 26 Otsaila 2019

Mende Berria Kantuz kontzertua aurkeztu dute gaur, Arriaga Antzokian, Bilboko Koralak, Gaudeamus Koralak eta Euskaltzaindiak. Kontzertua martxoaren 10ean eskainiko da aipatu antzokian, Bilbon, Euskaltzaindiaren mendeurrenaren ospakizunen baitan, eta Bilboko Koral Elkarteko Euskeria koruak, Gernikako Gaudeamus Koralak, Lauko Quartet laukoteak eta Maddalen Arzallus bertsolariak parte hartuko dute.
Andres Urrutia (euskaltzainburua): "Dei egiten diogu euskal gizarteari, mendeurrenean antolatu ditugun egitasmo kulturaletan parte har dezan, goza dezan musikarekin eta kantuarekin, Euskaltzaindiaren jarduna ez baita akademikotasunera mugatzen".
Sarrerak Arriaga Antzokiko leihatiletan (fisikoan nahiz birtualean) daude salgai, eta, ohi bezala, deskontuak izango dira (Bilboko Koral Elkarteko bazkideek % 25ekoa). Sarreren prezioa 7 eta 16 euro bitartekoa da, eta 14 urtetik beherakoek 8 euro ordaindu beharko dute.

Kontzertu berria aurkezteko, Arriaga Antzokian izan dira gaur Andres Urrutia euskaltzainburua, Ignacio Malaina Arriaga Antzokiko zuzendari kudeatzailea, Iñigo Alberdi Bilboko Koral Elkartearen kudeatzailea, eta Julia Foruria Gaudeamus Koralaren zuzendaria

Jakina denez, Akademiaren mendeurrenaren ospakizunak 2018ko urrian hasi ziren, Arantzazuko biltzarrarekin, eta urtebete iraungo dute; Arantzazun izan zen Mende Berria Kantuz ikuskizunaren estreinaldia, baina Iruñean ere izan dira Euskeriako gazteak, eta aurrerantzean ere kontzertu gehiago eskainiko dira Euskal Herriko beste lurraldeetan. Horietan guztietan, Bilboko Koral Elkarteko abeslari gazteen taldea, hau da, Euskeria korua izango da abesbatza finkoa, eta gonbidatua, berriz, lurralde bakoitzeko koru bat izango da. Arriagako kontzertua zikloko hirugarrena izango da. Iñigo Alberdik gogoratu duen moduan, "Euskaltzaindiaren 100 urteko lana aitortzea da egitasmo honen xede nagusia, baina, horrez gain, zenbait musika-elkartetako abeslariei, beren familiei eta, oro har, publiko euskaldunari begirako topagune eta elkarrekintza-tokiak sortu nahi dira".

Euskeria koruak Nafarroako eta Gipuzkoako kontzertuetara bertaratuak abesten jartzea lortu zuen. Orain, Gaudeamus Koraleko abeslariekin batuko ditu ahotsak eta elkarrekin kantatuko dituzte Enrike Txurrukak korurako eta jazz-comborako egokitu dituen euskal pop pieza zenbait. Musikagileak, gainera, teklatua joaz lagunduko ditu bi abesbatzak (harekin batera ariko dira Mikel Bikandi -gitarra-, Mikel Azkargorta -baxua- eta Guillermo Sanz -bateria-). Halaber, batutaren ardura Urko Sangronizek (Euskeriaren zuzendaria) eta Julia Foruriak (Gaudeamusen zuzendaria) banatuko dute. Gainera, Maddalen Arzallus bertsolariak ekitaldiko lanen arteko haria gidatuko du.

Besteak beste, Bizkaia maite, Aitormena, Sarri Sarri, Lau teilatu, Ilargia eta Euritan dantzan kantatuko dituzte koruek.