'Help the Basque Children' zigiluak

Natalia Benjamin

Erresuma Batuak ez zuen hasieran euskal umerik aterpetu nahi, Espainiako gerran ez parte hartzeko ituna sinatua baitzuen Europako beste 27 herrialderekin batera; baina, gizarte zibilaren presioaren aurrean, eta Gernikako bonbardaketak nazioartean eragindako zirrararen eraginez, amore eman, eta lau mila ume inguru hartu zituen azkenean. Hartu bai, baina besterik ez. The Basque Children’s Committee eta beste boluntario-elkarte batzuen bizkar geratu zen ume haiek guztiak zaintzeko eta haien egonaldia finantzatzeko ardura.

Testu-mota: Artikulua

Garaia: XX. mendea (1936-1939)

Argitalpen-urtea: 2005

Atala: Historia

Gako-hitzak: Gerra Zibila gerrako haurrak Ingalaterra ebakuazioak

Euskal Haurren Batzordeak (‘the Basque Children’s Committee’, BCC) zigilu batzuk atera zituen 1938an “Help the Basque Children” izenpean. Horrelako zigiluei “Cinderella” edo “Marixor” deritze filateliaren arloan, zigiluen itxura bai, baina posta-baliorik ez dutelako edota posta-administrazio ofizial batek argitaratuak ez direlako. Multzo horretan sartzen dira dirua biltzeko zigiluak edota Gabonetakoak, besteak beste.

Hiru bineta inprimatu zituzten. Lehenengoa, urdina, mutiko baten irudia erakusten zuena, 1938ko irailean argitaratu zen. José María Puertas zen mutikoa, Street-eko koloniakoa. Beste bi zigiluak, bata berdea eta bestea gorria, neskato baten irudia zeramatenak, 1938ko abenduan atera ziren. BCCren diru-bilketa kanpainaren barruan saldu ziren, honako azalpen honekin:

Mila euskal ume errefuxiatu Erresuma Batuak eskainitako bake ederraz eta segurtasunaz gozatzen ari dira oraindik. Hemen bizitzen jarraitu nahi dute Espainiako Gerra amaitu eta berriro beren amekin eta aitekin elkartzeko aukera izan arte, haietako gehienak preso politikoak baitira une honetan, edota berak ere errefuxiatuak. Baina haur horiek mantentzea dirua kostatzen da, eta horregatik, zigilu hauetako batzuk erosiz laguntzeko eskatzera datozkizu.

24 zigiluko orri bat 6 penny besterik ez da kostatzen. Oso gutxi da, baina 100.000 lagun batzen badira ahalegin honetan, pentsa zer izango den.

Zenbat saldu ziren jakiteko aztarnaren bat badugu, Spanish Relief-en 1939ko iraileko zenbakian (National Joint Committee for Spanish Relief-en 15. buletina) argitaratutako ohar bati esker: “Euskal haurren zigiluak martxa onean saltzen segitzen du. Ehun liberatik gorako irabazia ekarri digu orain artean”.

1939ko hasieran, Peace Pledge Union erakundeak, Langham-en (Colchester) kokatutako The Oaks kolonia finantzatzen zuenak, bere zigilua atera zuen, haiek ere dirua biltzeko asmoarekin eta “Oraindik Ingalaterran” izenpean. Zigilu horiek dohainik banatu ziren, baina donazioak eskatuz. Badakigu, Peace News-en argitaratutako artikulu bati esker (1939ko ekainak 30), irudian agertzen den haurrak sei urte zituela, koloniako hiru haur gazteenetako bat zela, eta Esperanza Careaga zuela izena.