Euskaltzaindiaren Hiztegia

Euskaltzaindiaren Hiztegia

forma=arrain-zopa sarrera bakarrean aurkitu da.

arrain

1 iz. Animalia ornoduna, uretan bizi dena eta hegalak dituena, ugaztuna ez dena eta arnasa zakatzen bidez hartzen duena. Ur gezatako, gazitako arrainak. Hegaztiak airean eta uretan arrainak. Arrainetara irten: arrantzara irten. Sareak hurrago, arrainak estuago (esr. zah.).

2 iz. Janaritzat erabiltzen den arraina. Arraina dugu bazkarian. Arrain gutxi eta haragi asko jaten dute. Arrain urdina zuria baino koipetsuagoa da.

3 iz. pl. (A larriz). Zodiakoko konstelazioa. Ik. pisces 1. Uztai antzeko izar-gerrikoa ageri baita hamabi izar mordorekin: Aharia, Zezena, Bikiak, Karramarroa, Lehoia, Birjina, Balantza, Eskorpioia, Sagitarioa, Kaprikornioa, Akuarioa eta Arrainak; han ikusten nuen guztia batean.

4 iz. pl. Zodiakoa banatzen den hamabi zatietako hamabigarrena, eguzkia Pisces konstelazioaren aurrean ikusten den aldiari (otsailaren 19tik martxoaren 20 artekoari) dagokiona; zati horri dagokion ikurra. Ik. pisces 2.

arrain hazkuntza, arrain-hazkuntza Arrainen eta itsaskien hazkuntza. Ik. akuikultura. Munduko toki askotan, urmaeletako arrain-hazkuntza oinarrizko elikagai iturria da.

arrain hegalari Exocoetidae familiako arraina, bularreko hegal handiak biziki astinduz, 50 metrorainoko jauziak egiteko gai dena. Ito egiten gara uretatik ateratzen bagaituzte, eta ez dugu ikusten bizi gaituen ura; arrain hegalariak bagina behintzat, ura kanpotik ikusteko!

arrain hezur, arrain-hezur Arrainen eskeletoa osatzen duten hezurretako bakoitza. Arrain hezur bat gelditu zaio zintzurrean.

arrain irin, arrain-irin Ura eta koipea kendu zaizkion arraina ehoz ateratzen den irin modukoa. Munduan arrain irin ekoizlerik handiena da Peru.

arrain salda, arrain-salda Arraina egosiz prestatzen den salda.

arrain saltzaile, arrain-saltzaile Bizibidez arraina saltzen duen pertsona. Ik. arraindun; arrainketari. Mundakako arrain-saltzaileak saskia hutsik zekarren. Arrain-saltzaileak saltokiak antolatzen ari ziren.

arrain sarda, arrain-sarda Itsasoan elkarrekin dabiltzan mota bereko arrainen multzoa. Ik. sarda; gorri2.

arrain txiki Tamaina txikiko arraina, txalupa motordun eta kidekoekin egiten den arrantzan harrapatzen dena, hala nola dontzeila edo paneka.

arrain zabal Arraia (itsas arraina). Afaritarako ez zen falta arrain zabala saltsan.

arrain zopa, arrain-zopa Arrain hezurrak eta arrain haragia barazkiekin egosiz prestatzen den zopa. Arrain zopa eskatu dute afaltzeko.

Oharra: azken eguneraketa 2018-07-13

  • Euskaltzaindia - Real Academia de la Lengua Vasca - Académie de la Langue Basque
  • Plaza Barria, 15. E48005 BILBO
  • +34 944 158 155
  • +34 944 158 144
  • info@euskaltzaindia.eus
© 2015 Your Company. All Rights Reserved. Designed By JoomShaper