Antonio Pérez Prados jauna,
Nafarroako Unibertsitate Publikoko errektorea
Arrosadia campusa
31006 Iruñea
Gaia: Nafarroako Unibertsitate Publikoan euskarazko plangintza jartzeaz
Jaun agurgarria:
Euskaltzaindia, errege akademia honek, hil honen 20an, Gipuzkoako Foru Aldundian egindako bere hileroko osoko bilkuran, adierazpen hau onartu zuela berorri aditzera ematea nahi du:
Nafarroako Komunitatea elebiduna da eta nafar guztiek dute elebidun izateko eskubidea. Nafarroako Unibertsitate Publikoko erkidego osoko unibertsitate publikoa da eta, hizkuntza-eremuz gaindiko erakundea denez, hiru eremuetako ikasleei eskaintzen dizkie bere zerbitzuak. Hortaz, elebiduna izan behar du, ikasleak elebidunak diren proportzioan behinik behin.
Elebitasuna printzipio kontua ez ezik eskubidea ere bada. Eta unibertsitate batean eskubide hori gauzatzerik ez dago ikasketa plangintza euskaraz eskaintzen ez bada.
Honetaz guztiaz gain, kontuan izan behar da Nafarroan 18/1986 Euskararen Legea dela eta, bigarren hezkuntzako ikasketak euskaraz egiten ari direnen kopurua gero eta handiagoa dela, eta, hortaz, gero eta gehiago direla unibertsitateko ikasketak euskaraz egiteko gai diren ikasleak.
Ikasle horiek, ordea, ez dute Nafarroako Unibertsitate Publikoan, oraingoz behintzat, karrera bakoitzaren enborrezko eta nahitaezko ikasketak euskaraz egiteko aukerarik, Irakasle Eskolakoak izan ezik.
Euskaltzaindia arautzen duen 573/1976 Dekretuak, Akademiari hizkuntza-eskubideak zaintzea eta euskararen erabilera aitzinatzea egozten dizkio. Hortaz, Euskaltzaindiak, bere eginbeharrak betetzearren, NUPeko arduradunei honako hau eskatzen die: nafar ikasleen hizkuntza-eskubideak errespeta ditzala eta, ondorioz, ikasketa bakoitzeko irakaskuntza plangintzan enborrezko eta nahitaezko irakasgaietan euskararen presentzia berma dezala.
Horrenbestez, har beza nire agurrik zintzoena.
Jean Haritschelhar Duhalde,
euskaltzainburua
Bilbon, 2001eko uztailaren 26an.
Euskera, XLVI, 2001, 2, 1083-1084.