Ez da jarri behar. Euskaltzaindiak gomendatutako moldean (37. araua) ez da punturik ageri: Durango(n), 1983ko martxoaren 7a(n). Hala izanik, puntu horren baliokidea den -garren atzizkia idaztea ere ez da egokia (ezta haren laburduraren bat ere): *1983garren, *1983gn.

Bi ohar:

1. Data-kontua da goiko hori. Joskera librean, urte hitza erabiliz gero, nahitaez erabili behar da -garren atzizkia: 1983. urtean gertatu zen hori (beste esanahi bat du 1983 urtean moldeak; ‘zenbat urtean?’ adierazten du: bi urtean = bi urteko epean den bezala, 1983 urtean = 1983 urteko epean da).
2. Urtea milakoaren zifraren eta ehunekoen zifraren artean punturik gabe idazten da: 1983 (*1.983).