a) Erreginaldi hitza ez da ageri ez Orotariko Euskal Hiztegian, ez Euskaltzaindiaren Hiztegian eta ez Lexikoaren Behatokian ere. Ez eta gainerako hiztegi elebidunetan ere. Tradizioan erregealdi erabili izan da gizonezko zein emakumezko errege-erreginek erreinatu duten aldia, hots, erreinaldia, adierazteko.

Hala ere, argigarria da erreparatzea Euskaltzaindiaren Hiztegian [EH:erreinaldi] eta [EH:erregealdi] hitzei ematen zaien adierari. Erreinaldiri balio neutroa ematen zaio (“Errege, erregina, printze edo printzesa batek agintzen duen denbora”); erregealdiri, berriz, sexu-ezaugarria ematen zaio (“Errege baten erreinaldia”).

Beraz, hiztegian gaur egun ageri ez bada ere, ondo eratuta dago erreginaldi hitza (erregina + -aldi), eta guztiz egokia da ‘erregina baten erreinaldia’ adierazi nahi denean.

b) Ildo beretik, ez dago eragozpenik erreginaordetza ere eratzeko.

Nolanahi ere, genero-berdintasunaren ikuspegitik berrikuntza horiek aberasgarriak izanik ere askotan, ez litzateke egokia errege elementua daramaten hitz guztiak aldatzen hastea. Halatan, bada, historiaren joan-etorrian moldaturiko formak beren balio neutroan mantentzea litzateke egokiena (errege-aulki, errege-bide (=errepide), errege-etxe, errege-makila, errege-zubi, errege-lur…); horrelakoetan ez da komeni iturri etimologikoari benetako erabilerari baino gehiago begiratzea.