Euskaltzaindiaren Hiztegiaren sarreren arabera —[EH:ilgora], [EH:ilbehera], [EH:ilargi bete] eta [EH:ilargi berri]—, ilbehera ilargi betetik ilargi berrira doan 14 eguneko aldia da. Bistan da, hortaz, ilargiaren aldi horiek haren itxura (gure planetatik ikusten den bezala) adierazten dutela, eta ez orbita. Euskaltzaindiaren Hiztegiak dioen horrekin bat datoz euskalki guztiak mendez mende. Beraz:

1. Ez da zuzena egutegi horrek dioena ilgora eta ilbehera hitzen esanahiari dagokionez.
2. Astronomoen kalkulu okerrik izan ezean, 2019ko apirilaren 19an ilargi betea izango da eta, beraz, apirilaren 15ean ilgora egongo da ilargia.
3. (es) luna creciente / (fr) lune croissante [EH:ilgora] da euskaraz; eta (es) luna menguante / (fr) lune décroissante, berriz, [EH:ilbehera].
4. (es) luna ascendente / (fr) lune montante eta (es) luna descendente / (fr) lune descendante bereizkuntza dela eta, euskalkietan eta euskarazko tradizio idatzian ez da ageri horren lekuko euskal ordainik (eta gaztelaniaz/frantsesez ere aski berria da). Horregatik, Euskaltzaindiak ez du arautu oraindik bereizkuntza hori.

Horrez gain, ikus hauek ere: "Lexikoa: Lurra, Eguzkia, Ilargia (Lurra/lurra, Eguzkia/eguzkia; Ilargia/ilargia)" (JAGONET), "Lexikoa: amandre (ilargi amandrea, amandre eguzkia)" (JAGONET).