Lehendabizikoa ere zuzena da, eta ez da nahitaez bigarrena erabili behar, baina ulergarritasunaren mugan dago, eta horregatik ez da gomendatzekoa.

<ni bizi naizen etxea> perpausa erabat ulergarria da (atzean <ni etxean bizi naiz> perpausa dagoela ulertzen da zuzenean), baina <ni bizi naizen laguna> ez da ulergarria (ez baita ulertzen zuzenean atzean <ni lagunarekin bizi naiz> perpausa dagoenik).

Galderako adibidean, dena dela, badago faktore bat NOREKIN kasuarekin erlatiboa sortzeko zailtasuna arintzen laguntzen duena: kasu-paralelismoa. Hots, perpaus erlatibatua sarturik dagoen izen-sintagmak ere kasu bera du, soziatiboa alegia (NOREKIN): Ni bizi naizen lagunarekin joan naiz mendira.

Kasu-paralelismo horrek egiten du nolabait ulergarri perpausa. Paralelismorik gabe, berriz, ez litzateke ulergarria eta, beraz, ez litzateke zuzena: *Ni bizi naizen lagunarentzako perretxikoak biltzera joan naiz mendira.