Teorian behintzat jakin dakit eta jakin badakit ez dagozkio egitura berari. Lehen kasuan, aditza galdegai gisa hanpatua da; eta bigarrenean, mintzagai gisa. Egia esan, aditza modu horretan adizkera trinkoekin galdegai gisa hanpatzea itzuli markatua da eta gutxitan baliatua, bereziki jakin aditzarekin; adibide gutxi dira Orotariko Euskal Hiztegiaren literatura-corpusean. Hona hemen bi:

Azkengabe jakintsu eta egiaren iturri zaren jaun handi horrek, gauza guztiak ezagun dezaguzkizu eta egia guztiak jakin dakizkizu (Izenik gabea, Gasteizko elizbarrutiko katixima) Arras erreza ei zan izarren egitea eta jakin zekian berak, bainan orduan lan egin behar zuan (Oskillaso, Kurloiak).

Aditza mintzagai gisa hanpatzea, berriz (alegia, jakin badakit), egungo euskaran bederen, errazago egiten dela dirudi.