JAGONET galde-erantzunak

Kuantifikazioa adieraztea: hainbeste arazo / hainbeste arazorik

Arrunta al da (onargarria?) -(r)ik partitiboaren erabilera ezezko esaldietan, zenbatzaile zehaztugabe batek laguntzen duen sintagman? Esaterako, Ez dugu hainbeste arazorik izan / Ez dugu hainbeste arazo izan.

Ez, ez da arrunta partitiboaren erabilera gisa horretako ezezko esaldietan; askoz ere erabiliagoa da Ez dugu hainbeste arazo izan egitura.

Onargarria ala baztertzekoa den? Euskaltzaindiaren Orotariko Euskal Hiztegiko datuen argitan, hobestekoa da partitiborik gabea: Ez dugu hainbeste arazo izan egitura da nabarmen nagusi bai Hegoaldean eta bai Iparraldean. Baina badira bestearen adibide bakan batzuk, Ez dugu hainbeste arazorik izan guztiz txartzat jotzen uzten ez dutenak: Bat txikia eta bestea handia izanik, ez da izango hainbeste kalterik (Koldo Mitxelena, Mitxelenaren Euskal Idazlan Guztiak, I, 96. or.).

Horrez gainera, ikus hau ere: "Araugintza: partitiboaren erabilera" (JAGONET).

 

Informazio gehigarria:

Zalantza-mota: morfologia > mugatzaileak, morfologia > zenbatzaileak

Unitate-mota: hitzak > determinatzaileak

  • Euskaltzaindia - Real Academia de la Lengua Vasca - Académie de la Langue Basque
  • Plaza Barria, 15. 48005 BILBO
  • +34 944 158 155
  • +34 944 158 144
  • info@euskaltzaindia.eus
© 2015 Your Company. All Rights Reserved. Designed By JoomShaper