Zuzena da hau ezin jasoa da esaldia. Orotariko Euskal Hiztegiko literatura-corpusean molde horretako adibide asko dago (baita ezin atzetik dela ere, jakina). Jaso aditzarekin bat bakarra (tripa ezin jasoa, ezer ezin jana, Iturriaga) [OEH:ezin], baina ugari beste aditz batzuekin: besteak beste, ezin askatua, ezin ahaztua, ezin agortua, ezin baztertua, ezin egona, ezin eramana, ezin esana, ezin jasana, ezin ikusia eta abar. Marratxo eta guzti idatzita ere agertzen dira literatura-tradizioan.

Nolanahi ere, <ezin + partizipioa> eta <partizipioa + ezin> egituretako ezin eramana / eraman ezina, ezin ikusia / ikusi ezina eta ezin egona / egon ezina eta gisako formak ez dira nahastu behar loturik idazten diren ezineraman, ezinikusi, ezinegon eta gisako izenekin.