Behin baino gehiagotan, arauaren aldeko kezka larriegia sumatzen da euskalgintzan dihardutenen artean. Komeni da ardura izatea entzuten eta erabiltzen dugun euskara zuzena ote den, egokia ote den; baina ardura horrekin batera, normaltzat hartu beharko lirateke, aukerakoetan, aukera guztiak onargarri izatea euskara batuan, guztiak erabilgarri.

Baztertu egin behar dira, jakina, gramatikalak ez diren egiturak eta, ondoren, batasunerako hain gomendagarri ez direnak, eremu urri batean baino erabiltzen ez direnak (baina horiek ere erabil daitezke leku jakin bateko ñabardura eman nahi bazaio testuari edo diskurtsoari).

Oro har, beraz, sintaxi-egituren kontuan ere, Euskaltzaindiaren Hiztegiko irizpide berak izan beharko genituzke gogoan. Orientabide horiek kontuan hartuta osatu da, esaterako, Euskara Batuaren Eskuliburua, eta hara ere jo daiteke jarraibide edo estilo-irizpide bila.