Ez dira egokiak era horretako esaldiak; izan ere, baino konparazio-elementua sartzen bada, ezinbestekoa da -ago ere ematea. Euskal Gramatika. Lehen Urratsak V, 409. or. liburukiak, era horretako esaldiei buruz, honela dio: “Dena dela, esamolde hauek osorik ematea askoz egokiago eta gomendagarriago dela esan behar“.

?? Telebistak urdailera zuzendu behar du burura baino.

Telebistak urdailera zuzendu behar du burura baino areago/gehiago.

Bi maila, bi gradu konparatzen dira hor, eta esaten da telebistak ‘maila batera’ (urdailera) gehiago zuzendu behar duela ‘bestera’ (burura) baino.

Ondorioz, galderako adibideek ere ukitu beharrekoak dira; bestela, perpausa herren gelditzen da, ez baita adierazten zertaz egiten den konparazioa. Honela behar lukete: Sentimenduei baino areago/gehiago emozioei egin behar zaie jaramon. Erlijioa norbanakoaren barruko joera da, gizartearena baino areago/gehiago.

Jakina, maila alderatu ordez, egin liteke perpaus bata baieztatu eta bestea ukatu (eta orduan ondo daude): Telebistak urdailera zuzendu behar du, eta ez burura. Sentimenduei ez, emozioei egin behar zaie jaramon. Erlijioa norbanakoaren barruko joera da, eta ez gizartearena.