Kasu-marka lotzean, neurri-unitateen sinboloei marratxoz eransten zaie aldian aldiko atzizkia: Bizkotxoa 180 ºC-(t)an egosten da. Tenperatura 100 °C-rantz hurbildu ahala...

Bestalde, -an/-tan (ZENBATEAN?) kasuen aukeran, biak dira zilegi euskara estandarrean. Hala ere, esan behar da Hegoaldeko literatura-tradizioan -ta- gabekoak direla nagusi: Bizkotxoa 180 ºC-an egosten da. Tutuaren mutur bat 20  ºC-an dago.

Hala egiten da kasu hauetan ere: NORA, NORAKO, NONDIK, NORAINO eta NORANTZ: Beroa 15 °C-(ta)ra igotzen denean. Tenperatura 100 °C-(ta)rantz hurbildu ahala... –ta- gabekoak dira nagusi horietan ere, nahiz biak dauden zuzen.

Modu berean jokatzen da beste magnitude fisikoak neurtzen dituzten unitateak deklinatzean: luzera (2 km-ra egon), masa (3 kg-ra hurbildu) eta denbora (handik 3 s-ra).

NOLAKO/ZENBATEKO kasuan, hala ere, -ta- gabeko aukera baino ez da zilegi (34. araua): 20 °C-ko (*20 °C-tako) tenperatura izango dugu bihar. –5 °C-ko tenperatura behar da egitura mantentzeko.