‘eta abar’ esapideak ez du komarik behar. Enumerazio batean, osagaiak komaz bereizi ohi dira, eta azken elementuaren atzean eta abar jartzen da, komarik gabe (elementu horiek perpausak edo oso elementu konplexuak ez badira, bederen). Adibidez: A, B, C eta abar (Ez: A, B, C, eta abar). Zezenak, behiak, txahalak eta abar (Ez: Zezenak, behiak, txahalak, eta abar) [EH:eta abar].

Laburdura (etab.) erabiltzen denean, aurretik koma jartzen zaio. Adibidez: Musika mota guztiak: koralak, herri-kantuak, musika klasikoa, etab. [EH:etab.]

Euskara Batuaren Eskuliburuan, "laburdurak" (EBE) fitxaren bukaeran, espresuki adierazita dago auzia.