Bi moldeak dira onargarriak. Adibideko esaldian ekintza (‘operatzea’) gertakizun den zerbait denez ―hasi gabeko zerbait, alegia―, geroaldiko forma (operatuko) erabiltzea da arau generikoa. Iker halako egunetan operatuko omen dute.

Baina Iker halako egunetan operatzen omen dute ez dago gaizki. Munduko hizkuntza asko dira orainaldiko adizkiez baliatzen direnak gertatzekoa denaz mintzatzeko. Halaxe euskaraz ere, eta arrunta da -tzen burutugabea erabiltzea geroaldia adierazteko ere; etorkizuneko gertakaria hitz egiten ari den uneari lotuago agerrarazteko-edo erabiltzen da. Denbora-mugaren noiz artekoa laburra izaten da, eta ohiturak desberdinak dira euskalkien artean. Hala, bada, ohikoak dira honelakoak euskaraz: Bihar ezkontzen da Urlia. Datorren astean jubilatzen naiz. Etzi datoz, ala? Bihar naiz partitzen ahizparenganat.