23. araua. Arazi
Gramatika-atalak:
Morfologia
- Euskara batuan, -arazi atzizkia hobesten da eta ez *-erazi. Salbuespen bakarra adierazi aditzarekin gertatzen da.
- Formaren aldetik, -arazi atzizkia aditzoinari lotzen zaio: bilarazi (bil + -arazi), ikusarazi (ikus + -arazi), jakinarazi (jakin + -arazi).
- Euskaltzaindiaren «Aditzoinen forma» 28. arauak -t batekin bukatzen diren aditzoinen zerrenda finkatu du. Hona batzuk: ausart, bat (batu), ezagut, laket, lant (landu), ohart, oroit…
Arazirekin -t- atxikitzen dute: ezagutarazi (ezagut + -arazi), ohartarazi…
- Aditzoina -r batekin bukatzen denean, normalean -r hori doblatzen da: sar(tu) > sarrarazi, igor(ri) > igorrarazi.
Salbuespenak: eror(i) > erorarazi, eserarazi, isurarazi…
- Arazi lotzen zaion aditza a bokalaz bukatzen baldin bada, a biekin bat egiten da: aldarazi (alda + arazi), jokarazi, koordinarazi...
- Xehetasun gehiago ukaiteko, Euskaltzaindiaren 43. araua, «Arazi aditzaren erregimena», kontsulta daiteke.
Idazkera zuzenak
jakinarazi, geldiarazi
ezagutarazi, ohartarazi
erorarazi, harrarazi
aldarazi, jokarazi
Idazkera okerrak
*ezaguarazi, *oharrarazi, *eroriarazi, *erortarazi, *erorrarazi, *hartuarazi, *hartarazi, *gelditarazi, *aldaarazi, *jokaarazi
