Euskara Batuaren Eskuliburua

izen-sintagmen arteko juntadura

izen-sintagmen arteko juntadura

111. araua hartu behar da kontuan, «Izen sintagmen arteko juntadura dela eta».

1. Kasu-marka bera dakarten sintagmak beti junta daitezke:

Bilboko jokalariek eta Bermeoko arraunlariek batzarra egin dute.

Zuri, niri eta beste askori gertatu zaigu.

2. Pertsona-izenordainak elkartzen direnean, denek eraman behar dute kasu-marka:

Niri, zuri eta beste lagunei gertatu zaigu (*ni, zu eta beste lagunei gertatu zaigu).

Gutaz eta zuetaz mintzo dira (*gu eta zuetaz mintzo dira).

3. Singularreko sintagma denean, gomendatzen da kasu-markadun sintagmak juntatzea, ez izenak soilik:

Itsasoan eta lehorrean bizi dira narrastiak.

Eskuz eta palaz jokatzen du.

Juntatzen diren izenak oso ‘hurbil’ekoak direnean, hala ere, edo izenlagunaz nahiz izenondoaz lagundurik doazenean, kasu-marka amaieran bakarrik ezar daiteke:

{Gorputz eta arima}tik atera den oihua.

{Bere emazte eta alaba}ri galdetu zien.

Izen bereziak juntatzen direnean, bi aukerak dira onak:

Pelloz eta Maddiz mintzatu zara.

{Pantxika eta Urko}ri kantatu diet.

4. Pluraleko sintagmetan, aukeran dago kasu-sintagmak juntatzea edo izenak juntatzea:

Itsaso(etan), mendi(etan) eta basamortuetan ibili da.

5. Juntaduran, isil daitezke zenbatzaile zehaztugabeak (hainbat, asko...), baina ez zenbatzaile zehaztuak:

Hainbat sagar eta (hainbat) udare.

Sagar bat eta udare bat (*sagar eta udare bat).

6. Singularreko komunztadura normala da izen abstraktuak juntatzen direnean ( komunztadura juntaduran: sing./plur.?):

Hori egiteko, kemena eta adorea behar da/dira.

 

Gehiago jakiteko

EUSKALTZAINDIA. “Onomastika: juntadura (Leire eta Enekok / Leirek eta Enekok)”, Jagonet galde-erantzunak.

PETRIRENA, Patxi (2011). Morfosintaxiaren inguruko zalantzak eta argibideak. Gasteiz: Ikasmaterialen Aholku Batzordea (EIMA)-Eusko Jaurlaritza (27-29).

  • Euskaltzaindia - Real Academia de la Lengua Vasca - Académie de la Langue Basque
  • Plaza Barria, 15. 48005 BILBO
  • +34 944 158 155
  • +34 944 158 144
  • info@euskaltzaindia.eus
© 2015 Your Company. All Rights Reserved. Designed By JoomShaper