Gramatikaren ikuspuntutik zuzena da -GATIKO atzizki konposatua (-gatik + -ko), baina literaturan oso tradizio urria du. Beste modu ohikoagoak baliatu izan ditu euskarak.

• hitz-elkarketa: sexuagatiko bereizkeria > sexu-bereizkeria

• erlazio-atzizkiak: aitatasunagatiko baimena > aitatasuneKO baimena (edo aitatasun-baimena)
• adjektibo erreferentziala: birusengatiko infekzioa > infekzio birala
• bestelako egitura batzuk:

- seme-alabak zaintzeagatiko lizentzia > seme-alabak zainTZEKO lizentzia

- txertoagatiko adenitisa > txerto BIDEZKO adenitisa

- nekrosiagatiko hantura > nekrosiak eragiten duEN hantura

Kausazko atzizkia (-gatik) ordezkaezina denean, <-gatik + ezarritako + izena>, <-i dagokion + izena>, <-en ondoriozko + izena> edo hitz-elkarketa soilez baliatu izan da:

amatasunagatiko kenkaria > amatasunagatik ezarritako kenkaria

minbiziagatiko heriotza > minbiziak eragindako heriotza

higiezinak besterentzeagatiko mozkin garbiak > higiezinak besterentzeari dagozkion mozkin garbiak

eguzkiagatiko erretinitisa > eguzki-erretinitisa

Azken urteotan, hala ere, asko samar hedatu da, erosoa gertatzen baita era honetako moldeak bideratzeko: azkar ordaintzeagatiko deskontu, desgaitasunagatiko diskriminazio, desgaitasunagatiko laguntzak, gainkargagatiko haustura, GIBagatiko entzefalopatia, kantitate metatuagatiko deskontua, hirugarren seme-alabarengatiko zerga-arintzea...

EHUko Euskara Zerbitzua (2013). “-gatiko”, Ehulkuren aholku guztiak. https://www.ehu.eus/eu/web/euskara/ehulkuren-aholku-guztiak.