EZAGUTU ≠ JAKIN. Ez dira sinonimoak. Arazoa es: (re)conocer / fr: (re)connaître hitzek eragiten dute, baina ezberdintasuna argia da: ‘ezagutzen’ diren hizkuntzak ‘hitz egiten’ (= ‘jakiten’) direnak baino gehiago dira. Ezagutzen dut euskara, baina ez dakit euskaraz hitz egiten. Beraz, esanahi ezberdinekoak dira esapide hauek: euskara ezagutzen du ≠ euskara(z) (ba)daki; ingelesa ezagutzen du / ingelesaren ezaguera du ≠ badaki ingelesez. Ildo beretik, ez dira berdinak jakite(-)maila eta ezagutze(-)maila moldeak ere.

BESTELAKO KALKO BATZUK. Halaxe gertatzen da, esate baterako, izan, ukan, egin, eragin eta antzeko aditzak ordezkatzen dituenean. ?Egitasmoak porrota ezagutu zuen hasiera-hasieratik (> Egitasmoak porrot egin zuen hasiera-hasieratik). ?Industrializazio handia ezagutu zuen Elgoibarrek XX. mendeko 60ko hamarkadan (> Industrializazio handia izan zuen Elgoibarrek / Industria asko hazi zen Elgoibarren XX. mendeko 60ko hamarkadan). ?Ez du berriro poza ezagutuko (> Ez du berriro pozik izango).

 ‘Izenez ezagutu’ esapidea. Egokia da ‘deritzon’ esan nahi denean (→ deritzat/deritzot (*deritzaio)). Orixe izenez ezagutzen da. Alfabeto semitiko izenez ezagutzen dena garatu zuten / Alfabeto semitiko(a) deritzona garatu zuten (*Alfabeto semitiko bezala ezagutzen dena garatu zuten). Zalantza egon liteke deklinabideari dagokionez (halako izenez ala halako izenaz?). Biak zuzenak izanik ere, idazleek gehiago jotzen dute mugagabera (izenez). (→ bezala)