Euskara Batuaren Eskuliburua

-ena egin: tontoarena egin (*tontoa egin)

-ena egin: tontoarena egin (*tontoa egin)

Genitiboa —-ena egin esapidean zehazki— izenik gabe ere erabiltzen da, eta euskal modu bere-bereak sortzen ditu. Zoroarena egin: ‘zoroaren itxurak egin’. Gaztearena egiten duten zaharrak. Antzerki horretan zaldun maiteminduarena egin zuen. [EH (11 du ad., -ena egin esapidea)]

 

Aditz-partizipioarekin eratuak ere ugari ageri dira tradizioan: ez ikusi/ikusia/ikusiarena egin, ez entzun/entzuna/entzunarena egin, ez ezagutuarena egin eta gisako esapideak. Ez ikusiarena egin nuen. Aitaren errietari ez entzunarena eginaz. Aditz-izenean (-t(z)e) oinarritutakorik ez dago. Alegia, betaurrekoak ondo jartzearena egin gisakorik ez dago. Horien ordez, honelakoak erabiltzen dira: Betaurrekoak ondo jartzeko imintzioa (keinua, planta(k)) egin z(it)uen.

 

KALKOA. Erdararen kalko okerra dago honelakoetan: *Ez ezazu txorimaloa egin (> txorimaloarena). *Beti zabiltza tontoa egiten (> tontoarena). *Ez zaitez ibil pailazoa egiten (> pailazoarena). Beste hau ere okerra da: *Pailazoarena mozorrotu da (> Pailazo(z) mozorrotu da). ( mozorrotu)

 

Gehiago jakiteko

EUSKALTZAINDIA. “Esapideak: ez ikusiarena egin / ?ondo jartzearena egin ”, Jagonet galde-erantzunak.

  • Euskaltzaindia - Real Academia de la Lengua Vasca - Académie de la Langue Basque
  • Plaza Barria, 15. 48005 BILBO
  • +34 944 158 155
  • +34 944 158 144
  • info@euskaltzaindia.eus
© 2015 Your Company. All Rights Reserved. Designed By JoomShaper