Aukera biak dituzten hizkeretan, bereizi egiten dira dagoeneko eta ordurako (beste hauek bezalatsu (→ oraindik/artean)), baina ez dago arau zorrotzik ematerik. Oraina bada erreferentzia —hitz egiten den unekoa, alegia—, dagoeneko erabiltzen da nagusiki: Luze iritzita ere banago dagoeneko. Hiruretan bazkaldu du, eta dagoeneko hor ari da igerian. Nolanahi ere, Euskaltzaindiaren Hiztegiaren arabera, dagoeneko iraganaldiko testuinguruetan ere erabil daiteke: Hori, urte haietan, dagoeneko aldarrikatua zuen Altubek.

Lehenaldian edo geroaldian kokatzen bada erreferentzia, berriz, ordurako (orduko, ordukotz) erabiltzen da nagusiki: Ordurako, gainera, atzerakorik ez duen pausoa emana zegoen. Jesusek ordurako erabakita zeukan zer egin. ‖ Ordurako, haiek beren lana egina izango dute nirekin.

Lehenaldiari begira inoiz agertzen den *zegoeneko, berriz, forma guztiz berria da, eta ez da bultzatzekoa. *Dardarka ari banintzen ere, zegoeneko (> ordurako, dagoeneko) ez nuen hotzik sentitzen. [EH]