1. BERRI ≠ BESTE BAT. Hau dio Euskaltzaindiaren Hiztegiak: «Gol berri bat sartu du eta kideko esapideen lekuan, Euskaltzaindiak beste gol bat sartu du eta kidekoak erabiltzea gomendatzen du». Horrenbestez, baztertzekoak dira *garaipen berri bat, *gol berri bat, *eraso berri bat, *istripu berri bat, *bilera berri bat... moduko esapideak, bistan baitago ez dagoela ez garaipen zaharrik, ez gol zaharrik, ez istripu zaharrik, ez eraso zaharrik, ezta bilera zaharrik ere, eta argi dago horietan guztietan beste bat dela erabiltzekoa. Beste gol bat sartu du Osasunak.

Berriro (ere) edo ostera (ere) eta gisakoak ere erabil daitezke zenbaitetan. Berriro ere istripua izan da autobidean. Ostera ere eraso egin dio aurkariari. Berriz ere euriak ekarriko ditu ekaitzak / Euri gehiago ekarriko d(it)u ekaitzak.

Inoiz, jakina, biak izan daitezke zuzenak, baina adiera ere hala ulertu behar da: Proposamen berria egin digute (nolakotasuna adierazten du: aurrekoa bertan behera utzi dute, eta haren ordezko proposamena egin digute). Beste proposamen bat egin digute (zenbatasuna, kantitatea adierazten du: aurrekoaz gain, badugu beste proposamen bat mahai gainean). Alde bertsua dute hauek ere: hiztegi berria erosi (= hiztegi berri bat) ≠ beste hiztegi bat erosi; disko berria plazaratu (= disko berri bat plazaratu) ≠ beste disko bat plazaratu; dekano berria hautatu (= dekano berri bat hautatu) ≠ beste dekano bat hautatu; teoria berria eratu (= teoria berri bat eratu) ≠ beste teoria bat eratu.

2. EGIN BERRI. Berrik badu beste erabilera bat: aditzaren era burutuaren (partizipioaren) ondoren, hari ‘duela oso gutxi’ esanahia gehitzen dio. Ezkondu berria da. Belar ebaki berria da. Ogi erre berriak ekarri. Oraindik jaio berria delarik. Irakurri berri dudan lan batean.

Bereiz idazten da, baina badira zenbait salbuespen pertsona-izenekin batera erabiltzeko: ogi erre berria baina haur jaioberria; liburu hasi berria baina ikasle hasiberria (dena dela, jaioberri eta hasiberri, kategoriaz, izen eta adjektiboak dira, gainerakoak ez bezala).

Aparte, berrik badu beste erabilera bat, adberbio gisa: jan-berri adberbioa marratxoz idazten da. Jan-berri nago.

Aditzaren erregimenari dagokionez, berri ezartzeak ez du aditz laguntzailea aldarazten; aditza nolakoa den (da/du) erregimen horri eusten dio: Joan berri naiz (*dut). Esan berri dut.