Bat zenbatzailearen plurala da batzuk (→ bat zenbatzailea), eta pluralean egiten du beti aditzarekin komunztadura.

DEKLINABIDEA. 12. arauan («Bat eta batzuk-en deklinabidea») dator jasoa batzukek euskara batuan duen jokoa. Koadroan dago osorik jasoa. Bereziki forma hauei erreparatzea komeni da:

- batzuez da forma egokia, ez *batzuetaz

- batzuetan da forma egokia, ez *batzutan

- *batzu forma ez da onartu baturako (*Batzu etorri dira (> batzuk))

- bereizi egin behar dira batzuk eta batzuek (*Gizon batzuk badakite hori (> batzuek)).

KORRELAZIOA. BAT zenbatzailearekin gorde ohi den bezala —batA/besteA, bateAN/besteAN...— (→ bata/bestea), berdin gorde behar da korrelazioa batzuk erabiltzen denean (pluraleko korrelazioa, batzuk plurala denez): batzuk/besteak, batzuek/besteek..., batzuetan... // beste batzuetan / besteetan.

Adibidez: Etxe honetan ez ezik, orobat gertatzen zen beste etxeEtan / beste etxe batzuEtan / besteEtan ere (*bestetan). (→ beste (bestek / besteek / beste batzuek))

KALKOA. Gaztelaniaren eraginez, sarri, izenondoei balio enfatikoa emateko, oker erabiltzen dira bat eta batzuk; horrelakoetan, hobe da ‘huts’ hitza edo gisakoren bat erabiltzea: ?Inozo batzuk zarete! (> Inozo hutsak/galantak zarete!). ?Alfer batzuk dira arduradun horiek (> Alfer hutsak/itzelak dira arduradun horiek). (→ bat zenbatzailea / -a artikulua (batzuk/-ak))