Euskaltzaindiak ez du araurik eman era horretako taxonek mugatzailearekin ala mugatzailerik gabe joan behar duten. Hezkuntza Saileko EIMAren estilo-liburuak (Zientzia eta Teknikako Euskara Arautzeko Gomendioak liburukiak) landua du kontu hori, eta, Euskaltzaindiaren oniritziarekin, jokamolde hau proposatzen du:

• Taxonaren aipamen hutsa egiten denean (izenburuetan, mapetan, grafikoetan, errotuluetan, enumerazioetan, parentesietan, irudi-oinetan eta abarretan), mugatzailerik gabe ematen dira.

Australopithecus aferensis

Homo neanderthalensisen suntsipena / Homo neanderthalensis espeziearen suntsipena

• Joskera arruntean, determinaturik edota partitiboan erabil daitezke. Zilegi da, halaber, mugatzailerik gabeko erabilera, banakoei dagozkien izen berezien ereduan.

Ngandongeko aztarnategikoak dira Javako lehen Homo erectusak.

Basamortuan ez da aurkitzen Acacia dealbatarik.

Homo sapiens da egungo hominido-espezie bakarra / Homo sapiensa da egungo hominido-espezie bakarra.

• Hizkuntzaren eguneroko erabilera arruntean —dibulgazio-testuetan, esaterako— izen arrunt modura ere erabil daitezke, eta letra xehez eta letra-estilo berezirik gabe idatzi.

Petuniak eta surfiniak oso antzeko loreak dira.

Gaizki ibili dira oriotar batzuk faloidesak janda.