Euskara batuaren ereduan hobetsi ez diren forma batzuk ez dira ageri deklinabide-tauletan, eta ez dira, beraz, forma estandarrak. Horietako bat da, esaterako, -an inesibo-marka (NON kasua), erdialdeko euskalkietan indartzaile gisa ablatiboari (-tik) edo partitiboari (-ik) gehituz erabiltzen dena, esanahiari ezertan eragin gabe; hain zuzen ere, -tikan eta -ikan moldeak. Adibidez: etxetikan, kaletikan...; dirurikan, asmorikan...; gogotikan saiatu naiz; "Hartu (e)ta leihotikan jaurti behar dut nik" (herri-kanta). Euskalki-moldeak dira.
-tikan moldea kontzesio-perpausetan eta denborazko perpausetan ere ageri da erdialdeko euskalkietan, baina horietan ere euskalki-moldea da, estandarrerako egokia ez dena: Laguntasun premian aurkituagatikan, [...]. Arrantzale-jendea beti dabil justu; saiatuagatikan ezin aberastu. Hara joaten hasi nintzanetikan, beste modu batera [...].
EUSKALTZAINDIA (1991). Euskal Gramatika. Lehen Urratsak I (EGLU I). Bilbo: Euskaltzaindia (248, 267, 406).
—(2011). Euskal Gramatika. Lehen Urratsak VII (EGLU VII). Bilbo: Euskaltzaindia (110, 269).
—(2002). Euskal Gramatika Laburra: Perpaus Bakuna. Bilbo: Euskaltzaindia (472-473).