Euskaltzaindiak ez dauka ezer arauturik auzi honi buruz. Hemen, Eusko Jaurlaritzako Hezkuntza Saileko EIMAk argitaraturiko estilo-liburuari jarraitzen diogu nagusiki. Zeregin hauetarako erabiltzen da:

1. Lehen batean, testu oro idazteko. Bereziki adierazita dago noiz ez den hala: → letra etzana noiz; → letra lodia noiz. Bestelako kontua da letra larriarena eta letra xehearena. (→ letra larria (maiuskula) noiz; → letra xehea (minuskula) noiz)

2. Izen bereziak emateko, oro har:

• erlijio, mito eta abarretakoak: Thor, Ala/Allah, Jahveh, Ortzi, Zeus, Apolo...

• pertsona, enpresa, erakunde eta gisakoenak: Ana Oria, Euskaltel, Euskaltzaindia... (→ izen bereziak: adierazpen izendatzaileen deklinabidea (leku-izen edo pertsona-izen ez diren izen bereziak))

• izenordeak: Bilintx, Orixe, Markinako Lehoia...

• orkestra, musika-talde, antzerki-talde eta abarretakoak: Euskadiko Orkestra Sinfonikoa, Ken Zazpi, Taupada...

• komiki, film, antzerki eta ipuinetako protagonisten izenak (gizakiak izan ala ez): Teo, Tintin, Pluto, Asterix, James Bond, Superman...

• etxe, baserri, mendi, ibai, kale, denda, taberna, hotel, zinema eta abarretakoak: Ajuriaenea, Agerre baserria, Hernio mendia, Deba ibaia, Kale Nagusia, Pitxintxu denda, Txarriduna hotela...

• merkataritzako marka, modelo eta salgaiak: Eroski, Opel Astra, Cola Cao...

• lege, dekretu, arau eta agiri ofizialen izenak

3. Siglak (→ siglak)

4. Sinboloak (magnitudeenak izan ezik) (→ sinboloak (nazioartekoak); → letra etzana noiz)

5. Interneteko helbideak (→ @)

6. Komatxo artean idazten direnak:

• hitzez hitzeko aipamenak: Eta honela esan zuen: “Gora Euskadi askatuta!”.

• iragarki, armarri eta abarretakoak: Lelo hau dauka Euskaltzaindiak: “Ekin eta jarrai”

• argitalpen nagusiago baten zati baizik ez diren artikulu eta abarren izenak: Argiak “Adio ETAri, stop sufrimenduari” artikulua dakar aste honetako zenbakian.

• hitzaldi, mahai-inguru, erakusketa eta abarren izenak: Bilbon, “Euskalkiak gaur” mahai-ingurua izango da.

7. Ortografiako puntuazio-markak (puntuak, komak, puntu eta komak, galdera-markak, harridura-markak, parentesiak, giltzak...), bestelako letra-moldea duten testuetan izan ezik. (→ eranskinak/puntuazio-markak)

ZUBIMENDI, Joxe Ramon (2004). Ortotipografia. Gasteiz: Ikasmaterialen Aholku Batzordea (EIMA)-Eusko Jaurlaritza (13-16). https://www.euskadi.eus/eima-estilo-liburua/web01-a3eima/eu/.