Adiera asko ditu eman aditzak, baina bada erabilera bat gomendagarria ez dena: *Neska-mutikoen artean ematen diren liskarrak moduko esapideak, esaterako. Honela ematea komeni da: Neska-mutikoen artean gertatzen/izaten diren liskarrak edo antzeko esapideen bidez. [EH]

Alegia, ez da zuzena eman aditzak gertatu, jazo edo izan aditzak ordezkatzea, erdarazko ‘dar’ aditzak eraginikoak. Erreparatu adibide hauei: *Futbol-txapelketako azken jardunaldian sei berdinketa eman dira (> Futbol-txapelketako azken jardunaldian sei berdinketa gertatu/jazo/izan dira). *Arazo hori hamasei urteko gazteen artean ematen da (> Arazo hori hamasei urteko gazteen artean gertatzen da).

eman = irudi izan / iduri izan / iruditu. Adiera egokian, parekoak dira. Adibide hauetan, esaterako: Horrela jantzita gizona ematen duzu (iduri duzu, dirudizu). (...) hibernatzen ari den hartza ematen du (iduri du, dirudi). Messi ematen du.