Batez ere egitasmoak-eta adieraztean, ez da zuzena hipotetikoaren alde egiten den gehiegizko lerratzea. Aldea nabaria da:

Gustatzen zait (‘ziurra, objektiboa’) ≠ gustatuko litzaidake (‘geroaldiko ondorio hipotetikoa’).

Gure egitasmoak bi helburu ditu (‘ziurra, objektiboa’) ≠ Gure egitasmoak bi helburu lituzke (‘hipotetikoa’).

Hasieran, kantatu egingo dugu; gero, dantzatu egingo gara (‘ziurra, objektiboa’) ≠ Hasieran, kantatu egingo genuke; gero... (‘hipotetikoa’).

Hala ere, gehiegizko lerratze hori zehaztea ez baita hain erraza, behar izan eta nahi izan aditzekin ohikoa da hipotetikoa erabiltzea, ziurra eta objektiboa izanda ere jarduna: Orixe eta Lizardiren adiskidetasuna nahi nuke gogoratu (= nahi dut gogoratu). Hamaika aldiz ahotan hartu den Barojaren idaztankera aipatu nahi nuke azkenik (= aipatu nahi dut). Ez nuke nahi (= ez dut nahi) zuetarik nehor bere egitekoetarik aldaratu.