Nagusiki ezezko esaldietan erabiltzen dira biak (galderazkoetan eta baldintzazkoetan ere agertzen dira, gutxiagotan bada ere). Baina:

• bat erek kasu-markak har ditzake; baterek, ez. Abereetarik batek ere ez du mintzorik baizik gizakiak. Hamarretatik bati ere ez.

• bat ere izen bati dagokio beti, eta ‘bat bera ere’ eta ‘bat bakarra ere’ baliokideak ditu. Bat zenbatzailea ukatzera dator nolabait (Ez zuen hitz bat (bera) ere ulertu. Txakur txiki bat ere gabe); baterek, berriz, erabateko gabezia adierazten du, ukapen osoa (→ batere ≠ ezer (deus)), eta izen bati dagokio batzuetan (Ez nuen batere asmorik zuei ezer eskatzeko), baina adizlagun gisa ere erabiltzen da adjektibo bati (Ez da batere egokia), adberbio bati (Ez zuela batere ongi aditu) edo aditz bati dagokionean (Buruzagi izateak ez zuen batere harrotzen). [EH]

Erreparatu bi hauen aldeari: Ez du batere saldu / Ez du bat (bera) ere saldu.