Hitz eratorriari ez dio beti adiera bera ematen. Hiru adiera hauek dira nagusi:

• Aditzoinei lotuta, ‘gertaera edo ekintza’ —eta batez ere ekintzaren ondorioa— adierazten du (tasun abstraktua gehienetan): aitortza, bizitza, ekintza, emaitza, ezkontza, iraultza, jaiotza, laguntza... (heriotza salbuespena da).
• Izenei lotuta, ‘multzoa edo ugaritasuna’ adierazten du: basatza, belartza, dirutza, harritza, hodeitza, jendetza, sasitza... Emankorra da toponimian ere: Elortza, Lizartza, Areatza...
• Lanbide- edo kargu-izenei lotutako gizaki-izenei erantsita, ‘lanbide- eta jarduera-izenak’, eta, haietatik eratorrita, ‘erakunde- edo erakunde-izenak’ adierazten ditu: zurgintza, alkatetza, igeltserotza, idazkaritza, lehendakaritza, bertsolaritza, argazkilaritza, artzaintza, ikazkintza, morrontza, neskametza, dekanotza, erretoretza, maisutza, irakasletza... Badu adiera hau -go atzizkiak ere. (→ -go (-eria))