Piarres Lafitte (1901-1985) euskaltzain osoa izan zen, gure herriaren historian garrantzi handia izan duena, bai bizi zelarik Ipar Euskal Herrian izan zuen itzalagatik, bai Euskal Herri osoan bere ikerketa eta idazlanek utzi duten aztarnagatik. Horiez gain, hark bildutako artxiboak balio berezia du euskararen eta euskalgintzaren ikuspuntutik. Lau ataletan banatzen da:

• Gutuneria: 956 pertsonak igorritako gutunak, garaiaren testigantza historikoa direnak.
• Lafitteren beraren lanen jatorrizko dokumentuak, bai berak eginak, bai berak argitaratutakoak.
• Clément Mathieu apezpikuaren erabakiz, Larresoro, Beloke eta Uztaritzeko seminarioetatik jasotako euskal testuak eta lanak.
• Bertso eta kanta zaharren bilduma.