Leku-izenak

(...)
[Euskararen mugak. Santakara] egun Maskolandas bihurtu den hau La Mazcolanda da 1616an [PRA-Kaparroso, 47. k.], Mazcolandas 1653an [PRA-Kaparroso, 46. k.] eta Marcolandas 1847an [Hipotekak, 172. zkia, 51. or.]. Aldaera hauek ikusita honela mintzo da R. Ciérbide lehen osagaiaren etimologiaz: "Ante estas fluctuaciones, y careciendo de documentación más antigua [Dituen lekukorik zaharrenak XVIII. Mendekoak dira.], parece difícil emitir un juicio sobre el primer elemento. Si tenemos en cuenta que la forma más frecuente es MARCO- podríamos suponer el antropónimo MARCOS, o bien el vasco MARKA, «marca, señal, frontera», pero tenemos que rechazar tal posibilidad si tenemos en cuenta que la primera forma registrada es MAZCO-" [TCO, 65. or.]. Gure ustez Mazko horretan beste zerbaiten zati den -Maz dugu, eta leku-denborazko genitiboaren -ko morfema. -Maz, bere aldetik, *Imaz-en moduko izen batetik atera ahal izan da, hasierako bokala aferesiz galdu duela. *Imaz-en zehaztugabeko Ima- oinarria, eta ugaritasunezko -tze-tik atera ahal izan den -a(t)z atzizkia genuke (cf. Imoz) [AV, 62. eta 144. orr.]. Landa-ri dagokionez, Ricardo Ciérbidek 'campo' adiera ematen dio, Mitxelenari jarraikiz, baina eskualde honetan landa 'landu gabeko eremua, larratza' da, Jimeno Juríok dioenez [THET, 124-125. orr.] (ikus Eslabako Landalarratza sarrera). Tafallako irakasleak egiten duen deskribapenak ez dio kontra egiten aipatu adierari: "Corraliza de propiedad municipal que disfrutan los vecinos. Ocupa gran extensión mugando con Ujué y Murillo. Es terreno de secano" [TCO, 65. or.].
(...)