NONGO, NOIZKO, NORAKO eta ZERTAKO kasuak izenlagunak nahiz adizlagunak izan daitezke, testuinguruaren arabera. Eta galdetzaile horiei erantzuten dieten atzizki-markek bitasun hori berekin dute.

• -ko: betiko zoriona (izenlaguna), betiko joan da (adizlaguna)
• -rako: norako autobusa hartu duzu? (izenlaguna); eta norako duzu labana? (adizlaguna)

Bitasun horren agerkari dira hemen beheko adibideak: bietako adibideak ikusten dira —‘-ko’-dunak ekialdeko euskalkietan batez ere, eta ‘-rako’-dunak mendebaldean maizago—, eta biak dira zuzenak:

Bilboko autobusa / Bilborako autobusa

mendiko botak / mendirako botak

etxeko lanak / etxerako lanak

laneko botak / lanerako botak

baserriko bidea / baserrirako bidea

elizako liburua / elizarako liburua

Arrateko igoera / Arraterako igoera

Osasun publikoko udal-zentroa / Osasun publikorako udal-zentroa

Euskaltzaindiak ez du gai honi buruzko araurik eman, baina jakingarria da, ohiko erabileran, Bilboko autobusa, mendiko botak, etxeko lanak eta gisakoak —-ra- gabeak, alegia— direla tradizio handienekoak.