Horixe da 159. arauan («Europako toponimia fisikoa») datorren idazkera (mar Cantábrico / mer Cantabrique adierazteko): Kantauri edo Kantauri itsasoa. Berariazko ohar bat ere badakar arauak: «Bizkaiko golkoaren zati bat da, eta ez da Bizkaiko golkoaren sinonimoa. Ez da beharrik gabe erabili behar. Adibidez, Euskal Herriko geografiaz ari garela, isurialde kantauriarra gabe, nahikoa da isurialde atlantikoa erabiltzea. Kantauri itsasoak Galiziako Estaca de Bares muturretik Aturriraino doan kostaldeko itsasgunea (Bizkaiko golkoaren zatia dena) baino ez du adierazten. Adibidez: Garai batean Kantauriko arrantzaleak ez ziren ondo konpontzen Akitaniakoekin (batzuk nahiz besteak Bizkaiko golkoan aritzen dira)».
Arau berean dator Kantauriar mendikatea izena ere, albo-erdaretako cordillera Cantábrica / cordillère Cantabrique adierazteko.