Sarri sortzen da zalantza. Nola behar du: Barakaldoko nire lagunak ala nire Barakaldoko lagunak?, kaleko zure arropak ala zure kaleko arropak?
Baliokidetzat hartzen dira maiz era horretako egiturak, eta, ondorioz, biak dira zuzenak eta erabilgarriak, nahasmenik sortzen ez badute.
Baina, esaterako, hauek ez dira baliokideak: ▼{Bilboko Euskaltzaindi}aren egoitza (Bilboko Euskaltzaindia?) ≠ Euskaltzaindiaren {Bilboko egoitza}.
IZENLAGUNAREN POSIZIOA. Gaur egun, izenlaguna izenaren multzoaren ezkerretara paratzen dugu, baina eskuinetara ere jarri ezinik ez dago. Idazle zaharretan normalak dira era honetako egiturak: Birjina Guadalupekoa, Jaun zerukoa, aita gurea, aingeru guardakoa, etab.
EUSKALTZAINDIA. ““Noren” adieraztea: Barakaldoko nire laguna / nire Barakaldoko laguna”, Jagonet galde-erantzunak.