Izenak adierazten duenez, iraganari buruzko aditzaldia da beti. Erabilera-modu hauek ditu:
• Baldintzazko ezinezko ondorioa adierazteko (baldintzazko ondorio irreala, alegia). Bi moldeak daude ondo: Garaiz esan (izan) bagenio, lehenago etorriko zen / etorriko zatekeen. Abisatu (izan) balidate joango nintzen/nintzatekeen bilerara. Testuinguru horretan, parekoak dira honako guztiok: zuen/zukeen, genizun/genizukeen, ginen/ginatekeen, etab. [42. araua, «Lehenago etorriko zen; lehenago asmatuko zuen»]
Ez da zuzena gertakari hipotetikoak baina gerta litezkeenak aipatzeko.
*Gustura joango nintzen Kubara (> Gustura joango nintzateke Kubara).
*Oraintxe bertan txuleta eder bat jango nuen (> Oraintxe bertan txuleta eder bat jango nuke).
*Gustatuko zitzaidan bihar sagardotegian txuleta jatea! (> Gustatuko litzaidake bihar sagardotegian txuleta jatea).
*Gonbidatuko banindute gustura joango nintzen bilerara (> Gonbidatuko banindute, gustura joango nintzateke bilerara).
EUSKALTZAINDIA (1991). Euskal Gramatika. Lehen Urratsak II (EGLU II). Bilbo: Euskaltzaindia (375, 425, 431).