Ez da nahastu behar -agatik menderagailuarekin (→ -agatik). Kasu-marka da -gatik (motibatiboa). Ez da nahastu behar, ezta ere, -gandik kasuarekin: *Zu(re)gandik egin dut (> Zu(re)gatik egin dut. *Ni(re)gatik zer espero duzue? (> Ni(re)gandik zer espero duzue?). (→ bizidun/bizigabe)

KALKOAK. Bi egitura hauek dira bereziki zaindu beharrekoak:

a) Ez da egokia erabilera hau: *Txabola nigatik egina da (> Txabola nik egina da / Txabola nik egin dut) (→ pasiboa (egitura pasiboa)). Hizkuntza erromanikoen kalkoa izateaz gainera, guztiz da nahasgarria euskaraz esaldi hori. Txabola nigatik egina da esaldia, beste norbaitek nigatik egin duela ulertzen da normalean, ez nik egin dudala. Desegokia da, era berean, *elurrarengatik harrapatua edo *mendiengatik inguratua esatea ere, elurrak harrapatua eta mendiek/mendiz inguratua esan ordez.

b) Desegokia da, era berean, -gatik erabiltzea kalkulu-eragiketak adierazteko. *Bigatik biderkatu (> biz / 2z biderkatu). (→ biderkaketa > biderketa)

MUGA-ARAZOAK. Jarraibide hauen alde egiten dute gaur egungo gramatika- eta estilo-liburuek:

a) ALDEA NOLA ADIERAZI. Mendebaldean -gatik erabiltzen da gehienbat (askogatik, gutxigatik, bi tantogatik... irabazi), eta ekialdean, berriz, ohikoago da instrumentala (bi tantoz); bi moldeak dira zuzenak eta egokiak.

b) ‘HAINBESTE(REN)GATIK’ ala ‘HAINBESTEAN’ / ‘HAINBESTEREN TRUKE’? ‘Edonork parte har dezake, 10 eurogatik’ esatea baino egokiagoa da ‘Edonork parte har dezake 10 euroren truke / Edonork parte har dezake, 10 euro ordainduta’ esatea.

c) -gatik ez da zuzena esapide banatzaileak sortzeko (→ -ko atzizki banatzailea). *Messik 106.684 € kobratuko du egunagatik / egun bakoitzagatik (> eguneko).

d) Ergatiboa, erabil daitekeenean, motibatiboa baino egokiagoa da maiz. ?Sedentarismoagatik sortutako eritasunek... (> Sedentarismoak sortutako/eragindako eritasunek...).

e) Erreparatu sarrera honi ere: → -gatiko.