Oinarrizko balioan, denbora adierazten du bitartean adberbioak, eta ez da egokia bi perpausen arteko aurkaritza edo aldea adierazteko baliatzea (nahiz tradizioan adibideren bat edo beste ageri den). Perpausaren arabera, aldea adierazteko, bitartean baino egokiagoak dira, besteak beste, eta zein baina juntagailuak, eta berriz eta ostera aurkaritzako juntagailuak.

?Fonema kontsonantikoak 24 diren bitartean, bokalikoak 5 dira (> Fonema kontsonantikoak 24 dira, eta (fonema) bokalikoak 5 / Fonema kontsonantikoak 24 dira; (eta) (fonema) bokalikoak, berriz, 5).

?Zuzendariari soldata igo zioten bitartean, teknikariok lehengo moduan geratu ginen (> Zuzendariari soldata igo zioten, baina teknikariok lehengo moduan geratu ginen).

Denbora adierazteko da egokia bitartean (bi ekintzak batera egiten direlarik, gainera; aldiberekotasunean). Andres egur bila joan zen; bitartean, anaiak bazkaria prestatu zuen. Fotokopiak egiten dituzun bitartean, nik kafeak ekarriko ditut. Umore onez esnatu da eta, garbitu bitartean, txistuka ari da alaikiro.

Denborazko balioaz gainera, beste balio batzuk ere baditu bitarteanek. Adibide hauetan, esaterako, espazio- edo denbora-tartea adierazi nahi du: Zumaia eta Zarautz bitartean dago Getaria. Sei eta zazpi euro bitartean saltzen da legatza.