Euskaltzaindiak arautu gabeko kontua da. Hona ekarri ditugun jarraibideak Hezkuntza Saileko EIMAren estilo-liburukoak dira nagusiki.

1. Bi puntuak noiz erabili behar diren jakiteko: → eranskinak/puntuazio-markak (bi puntuak).

2. Honela egiten da bi puntuen ondorengo idazkera:

•  Esaldi osoko aipamena bada, letra larriz hasten da: Mikelek, orduan, oihuka: «Gora Euskadi askatuta!».

•  Esaldi oso baten zati edo aurreko zatiaren osagarri bada, letra xehez: Egun hauetan hotz handia egiten du: horra denon kexa.

•  Gutun-hasierako diosal eta bokatiboen ondoren, larriz. Adibidez: Jaun/andre estimatua: / Biziki estimatuko nizuke zure diru-ekarpena... → eranskinak/puntuazio-markak (bi puntuak (7))

•  Zerrendetan, oro har:

- Letra larriz hasita, zerrendakoak esaldi osoak direnean. Adibidez:

Datorren astearteko bilerako aztergaiak:

- Aurreko bileraren agiria irakurri eta, ongi irudituz gero, onartzea.

- Hurrengo jardunaldiko programaren xehetasunak aztertzea.

- Norberak dakartzan proposamenak aurkeztea.

- Letra xehez, esaldi osoak ez direnean (punturik gabe bukaeran). Adibidez:

Hauek dira alorrez alorreko euskalgintzako profesionalak:

- irakasleak (hezkuntza orokorrekoak nahiz euskaltegietakoak)

- kazetariak

- itzultzaileak, idazleak eta argitaratzaileak

- administrazioko langileak

- ...