Hitz-elkarketa, normalean, bi osagaiko sintagma izan ohi da: ardi(-)gazta, bazkide(-)zerrenda, udal(-)agindu... Zer gertatzen da bi izen baino gehiago (= berrelkarketa) gertatzen denean? Nola jokatu?

1. Ez da komeni euskal aldizkari(-)zuzendari(-)bilera edo Mendibilgo udal(-)kirol(-)patronatua moduko berrelkarketa luzeak egitea. Hobe da, horrelakoetan, zenbait sintagma-erabide konbinatuz jokatzea. Adibidez: euskal aldizkari(etako) zuzendarien bilera edo Mendibilgo Udalaren kirol(-)patronatua.

2. Tartean adjektiboren bat sartzen denean, ez da hitz-elkarketarik egin behar: hautagai(-)zerrenda baina hautagai berrien zerrenda (*hautagai berri zerrenda); gazte(-)aldizkaria baina gazte abertzaleen aldizkaria (*gazte abertzale aldizkaria). (→ izenondoa hitz-elkarketaren barruan)

3. Nolanahi ere, berrelkarketa onargarria da kasu hauetan:

- Mugatzailea euskal, erdal, frantses... dutenetan: euskal musika(-)taldea, erdal joskera(-)moldea, frantses lege(-)araudia.

- Mugatzailearen koordinazio-hedapenetan: emakume(-) eta haur(-)taldeak, edari(-) eta izozki(-)saltzailea, galdera(-) eta harridura(-)markak, Hezkuntza, Unibertsitate eta Ikerketa Saila.

- Elkartearen bigarren osagaia sorta, kopuru, multzo, sail..., puska, ale, izpi, tanta, zati..., mota, era, klase, molde, itxura, modu... eta gisako hitzez eraturiko elkarteetan, baita tartean adjektiboren bat sartzen denean ere: butano(-)saltzaile itxura, liburu zahar bilduma, kafe erre usaina, zakar(-)biltzaile taldea, dantzari txiki taldea, hartz arre bikote, orein(-)haragi zatia, perpaus subordinatu motak, zuntz optiko motak. [25. araua] (→ mota (▼-en mota))