Aditz bakoitzak zer erregimen duen berariaz dator adierazita Euskaltzaindiaren Hiztegiko aditz-sarreretan. Lau erregimen edo aditz-mota daude: da/zaio/du/dio. Etorri aditza, esaterako, da da; aitzindu, berriz, zaio; ekarri, du; eta iritzi, dio. Marka horiek duela urte batzuetako deitura-moduak ordeztera etorri dira (alegia, lehengo NOR, NOR-NORI, NOR-NORK eta NOR-NORI-NORK sistematizazio-modua edota iragankor/iragangaitz banaketa).

Aditz-erregimenaren sistema, hala ere, ez da erabat itxia:

• da diren aditz asko zaio ere izan daitezke (etorri da/zaio).

• du diren aditz asko dio ere izan daitezke (ekarri du/dio).

• Aditz batzuen erregimena aldatu egiten da eskualdearen edo euskalkiaren arabera (lagundu, deitu, utzi...; lagundu dizut/zaitut).

• Aditz askok da eta du erregimenak dituzte, adieren arabera (aberastu, adiskidetu, agortu, ahal izan, alaitu, iguriki...; aberastu naiz/dut).

Baina:

• zaio bakarrik diren aditzak (iruditu, jario, kostatu...) ezin dira da izan (salbu egitura inpertsonalak: Hau gutxiago kostatu da).

• dio bakarrik diren aditzak (ekin, eraso, eutsi, iritzi...) ezin dira du izan (baina zaio izan daitezke egitura inpertsonaletan: Baserri giroan, eusten zaio fama txar horri).

• Aditz arazleek (irakurrarazi, sarrarazi, eginarazi...) erregimen berezia dute. (→ -arazi (-erazi))