Kultur ekimenak

Lautan Hiru antzerki-jaialdia

Euskaltzaindiak 2019an antolatu zuen Lautan Hiru antzerki-jaialdiaren lehen aldia, Bilboko Udalaren babesarekin. Ordutik, urtero egin izan da Bilboko Zazpikaleetan.

Azken urteotan Baionara ere zabaldu da.

Ekimenak euskarazko antzerkia hauspotzea du helburu nagusi, antzerkilariei beren lanak erakusteko espazio berriak eskainiz.

Akademia da egitasmoaren bultzatzailea, baina Tartean konpainia, Zazpi Katu Gaztetxea eta BIRA kulturgunearekin elkarlanean antolatzen du.

Formatu txikiko lanak erakusten dira Lautan Hirun, hala iraupenari nola muntaiari dagokionez. Oro har, 20-30 minutuko piezak izaten dira.

Irailekoak poesia-jaialdia

Euskaltzaindiak 2023an antolatu zuen estreinako Irailekoak, Lekeition (Bizkaia).

Ordutik, urtero antolatu da, izan Lekeition bertan, izan Itsasun (Lapurdi).

Jaialdiaren bitartez, euskal poeten lana gizarteratu nahi da, baina, era berean, beste bazter batzuetako sortzaileak ezagutzeko parada ematen du jaialdiak.