Patxi Salaberri Zaratiegi hizkuntzalari eta euskaltzainak parte hartu du Alcalá de Henares (Madril, Espainia) egin berri den Hizkuntzalaritza Orokorraren Nazioarteko XII. Biltzarrean. Bertan "Análisis de la evolución de la aspiración en euskera a través del estudio de la toponimia alavesa" izeneko komunikazioa aurkeztu zuen.
Joan den larunbatean, maiatzaren 28an, 14. Euskararen Eguna ospatu zuten Miranda Argan (Nafarroa). Euskararen Lagunak elkarteak urtero antolatzen duen jaia da eta bertan, besteak beste, bederatzaigarren ediziora heldu den "Erdialde" euskarazko idazlan laburren lehiaketaren sariak banatzen dira. Aurreko edizioetan bezalaxe, larunbatekoan Euskaltzaindiak emandako liburu sortak banatu ziren saridunen artean.
Bilboko Liburu Azokak 2016ko Urrezko Luma Andres Urrutiari emango dio. Euskaltzainburuak berriki aurkeztu du Blas de Oteroren Historias fingidas y verdaderas lanaren euskarazko itzulpena, Istorioak, alegiazkoak nahiz egiazkoak izenarekin. Hain zuzen ere, Bilboko poeta omenduko du aurtengo Azokak, bere jaiotzaren mendeurrenean.
Anjel Lertxundi idazle eta euskaltzain urgazleak Atea-Laboral Kutxa saria jaso du gaur, ekainaren 2an, Bilboko Liburu Azokaren inaugurazio ekitaldian. Manuel Rivas idazle galiziarrari ere eman diote saria. Ekitaldian Juan Mari Aburto Bilboko alkatea, Jose Ramón Taranco Laboral Kutxaren Komunikazio zuzendaria, Asier Muniategi azoken koordinatzailea eta Toti Martinez de Lezea idazlea izan dira.
Euskaltzaindia parte hartzen ari da gaur zabaldu den Bilboko Liburu Azokan. Akademiak saltokia jarri du eta urte osoan argitaratutako liburuak salgai ditu. Ekainaren 2tik 12ra bitartean Areatzan izango da.
