Webgune honetan Aita Villasantek idatzitako lanak biltzen dira, guztiak argitaratuak. Lau multzo nagusitan daude banatuta: liburu osoak (41), liburu zatiak (106), artikuluak (769) eta edizio bereziak (hots, Villasantek bildu, editatu edota prestatutako liburuak, guztira 13).

Aita Villasantek 57 urtetan zehar argitaratu zuen: lehen argitalpena 1944koa da, eta azkena 2000koa. Guztira, argitaratutako 929 idazlan katalogatu eta bildu dira.

Bi bilaketa sistema ditu: testu osoko bilaketak eta katalogoaren bidezkoak (sei kategorien bidez: izenburua, hizkuntza, gaia, aldizkaria, lan-mota eta data).

Zehaztapen teknikoak

• Idazlan guztiak PDF formatuan digitalizatuta eskaintzen dira. Kasu ia guztietan dokumentuaren azalaren irudiaz gain, bi bertsio eskaintzen dira: bata “Dokumentua” izenekoa eta bestea “Testu zuzendua” izenekoa.
• “Dokumentua” motakoak paperezko bertsioaren argazki leialak dira.
• “Testu zuzendua” motakoek, ezinbestez, lanketa bat daukate. Ahalik eta maketazio- edo taxutze-agindu kopuru txikiena erabiliz, idazlan guztien aurkezpen homogeneo eta koherentea eskaintzeko ahalegina egin da, elementu formal nagusiei beti irizpide berberak esleituz: goiburuak, izenburu eta azpi-izenburuak... Gainerakoan, dokumentu originalen irizpideak errespetatu dira.
• Testuen zuzenketak egiterakoan ere bertsio originalaren literaltasuna errespetatu da. Aitzitik, akats tipografiko arrunt gisa hartzeko modukoak zuzendu egin dira sistematikoki.
• Edizio berezien kasuan (hots, Villasantek bildu, editatu edota prestatutako liburuak) ez da “Testu zuzendua” prestatu, beharrezkoa ez dela iritzirik.

Euskaldunon egunkariak 1991ko abenduaren 6an kaleratu zuen lehenbizikoz Nafarkaria izenarekin Nafarroako bere gehigarria. Geroztik ostiralero ikusten zuen argia, harik eta 2002. urtean, larritasun ekonomikoak itota, desagertu zen arte. Zortzi orrialde izaten zituen eta bertatik Nafarroako kazetari, idazle eta era askotako pertsonaiak pasatu ziren, albisteak, iritziak eta gauza jakingarri asko azalduz.

Euskaltzaindiak pentsatu zuen altxor hori guztia ezkutuan geratzea ez zela bidezkoa; euskarri digitalean bere webgunean jarri behar zuela. Hori egin ahal izateko, Euskaltzaindiak eta Nafarroako Gobernuak 2011rako sinatu zuten hitzarmenean Nafarkaria digitalizatzea eta  Interneten kontsultagai jartzea adostu zuten. Halaxe egin zen eta lan horren fruitua eskaintzen da, hain zuzen, orri honetan. Ale guztiak kontsultatzeko eta jaisteko aukera dago. Kontsultak egileen arabera, nahiz bilatzailearen bitartez egin daitezke. Emaitzak, berriz, paperezko albistariak zuen itxura berberarekin ikusten dira.

Webgune honetan Resurreccion Maria Azkuek idatzitako eta argitaratutako lan guztiak biltzen dira. Hamar multzotan sailkatu dira: liburu enblematikoak (4), gainerako liburuak (54), liburuxkak (23), artikuluak (742), itzulpenak (10), editorea/zuzendaria/biltzailea (5), berredizioak (8), egokitzapenak/Azkueren lanen itzulpenak (12) eta gutuneria argitaratua (9).

Sailkapen hori ez da beti ebidentea eta zenbait xehetasun eransten ahal zaizkio, hainbat ildotan. Baina bibliografia bere osotasunean haztatu ondoren aski koherentea eta argia delakoan gaude, zehaztapenak zehaztapen.

Bi bilaketa sistema ditu: testu osoko bilaketak eta katalogoaren bidezkoak (lau kategorien bidez: izenburua, gaia, lan-mota eta data).

Zehaztapen teknikoak

• Orotara 922 idazlan bildu dira, baina 952 PDFtan banatuta, hainbat liburu tomo desberdinetan banatuta daudelako. Lau liburu enblematikoen multzoan zenbait kasutan idazlanaren erreferentzia eta azala jaso da, baina testua ez, argitalpena lehen edizioaren faksimile hutsa delako; beste kasu batzuetan faksimile horietan Azkueren testuaren ondoan argitaratutako beste testu batzuk ere bildu dira, Azkuerenak ez izan arren (Villasanteren edo Kerexetaren hitzaurreak, adibidez).
• Idazlan guztiak PDF formatuan digitalizatuta eskaintzen dira (“Dokumentua”).
• Bi motako PDFak egin dira: idazlan gehienek irudipeko testu zuzendua dute eta, hartara, testu osoko bilaketak egin daitezke; arreta berezia jarri da hitz propioak edo kontzeptu nagusiak zuzentzen. Salbuespenezko kasu batzuk irudi soil gisa digitalizatu dira (edizio faksimiletan Azkuek berak idatzitakoak ez direnak, egiletza berezikoak –editore, zuzendari, biltzaile–, berredizioak, Azkueren lanen egokitzapen eta itzulpenak, musika partiturak), hau da, jatorrizko dokumentuaren irudi leiala dira. Zehaztapenetarako, ik. SarreraEtaZenbaitOhar.pdf (PDF, 173,7 kB) txostena.
• Idazlan bakoitzari gai bat esleitu zaio taula orokor baten arabera eta, ondorioz, gai horren araberako bilaketak egin daitezke, Gaia eremua erabiliz.
• Aldizkari batean argitaratutako artikulu guztiak batera bilatzeko, erabili Idazlan-mota eremua.
• Kasu gutxi batzuetan ez da dokumentuaren azalaren irudirik erantsi.