Zenbatekoa aditzera emateko, zenbatzaile zehaztuez gain —kardinalak, ordinalak, banatzaileak— , badira zehaztugabeak ere, kopuru zehatza ez baizik eta gutxi gorabeherako multzoa adierazten dutenak: asko, gutxi, hainbeste, zenbait, anitz, franko, ugari, nahikoa, hamaika, batzuk...

DEKLINABIDEA. Bakoitzaren ohiturari jarraituz, sintagmaren ezker edo eskuinaldean joan ohi dira, eta izen-sintagma mugagabea eskatzen dute: jende askori adierazi, hainbeste nekeren ordainetan, hizkuntza frankotan mintzatu, hamaika aldiz esan...

Bi salbuespen daude:

• Denbora denean [110. araua], leku-denborazko kasuetan, inesiboan, mugatu singularra dago hobetsita: denbora gutxian, urte askoan, hainbeste hilabetean... Xehetasunetarako: (→ zenbatzaileak eta leku-denborazko sintagmak (-ra/-tara: 5 kilometrora/kilometrotara; 5 graduan / 5 gradutan; 5 euroan / 5 eurotan...)).

• Batzuk beti izen-sintagmaren eskuinean jartzen da, eta komunztadura pluralean egin behar du: Ume batzuk ikusi ditut (*dut). (→ batzuk)

KOMUNZTADURA. Bi aukerak —singularra zein plurala— zilegi dira. Hainbat liburu aurkitu zuen/zituen han. Zenbait lagun ikusi dut/ditut. Liburu asko erosi dut/ditut.