Polo geografikoek munduko eskualde bat, leku-izen bat, adierazten dutenean, izen bereziak dira, eta letra larriz hasita idatzi ohi dira: Egia ote da Peary izan zela Ipar Polora iritsi zen lehena? Ipar Poloa ez da munduko tokirik hotzena. 1911n, Amundsen Hego Polora iritsi zen.

Poloek Lurraren errotazio-ardatzak Lurraren gainazala edo zeru-esfera ebakitzen duten irudizko bi puntuetako bakoitza (lurreko poloak edo zeruko poloak, hurrenez hurren) adierazten dutenean, letra xehez idaztekoak dira, puntu kardinalak eta Lurreko eta zeruko gainerako irudizko puntu eta lerroak bezala: Meridianoak ipar polotik eta hego polotik pasatzen dira, eta ekuatorea ebakitzen dute. Lurrak bezala, gainerako planetek ere badituzte ipar polo eta hego polo bana. Zeruko ipar eta hego poloak irudizko bi puntu dira, zeinetan Lurraren errotazio-ardatzak, mugagabeki luzaturik, zeru-esfera ebakitzen baitute.

Nolanahi ere, ez da beti hain argia bereizketa, batzuetan bi adierak nahasi egiten baitira.

Ipar polo eta hego poloren sinonimoak dira iparburu eta hegoburu, eta haiek bezala moldatzen dira.

Bestalde, aske higi daitekeen iman baten kasuan, iparralderantz seinalatzen duen imanaren burua imanaren ipar poloa da eta iparralderantz seinalatzen duen imanaren kontrako burua imanaren hego poloa da, letra xehez hasita idatzita.